ബാല്യസ്മരണ

"കാലമേ... എല്ലാമെടുത്തു കൊള്‍ക

എന്റെ ബാല്യം തിരിച്ചേകുക!"

ചോദിക്കയാണിന്നു ദാഹാര്‍ദ്രനായ് 

ഓര്‍മയിലിന്നലകളുണരെ 

അവയോരോന്നും ആയിരത്തിരി-

കളായെന്നുള്ളില്‍ തെളിഞ്ഞു നില്‍ക്കെ.

നറുചന്ദന മണമുതിരും 

വൃശ്ചികപ്പുലരിയില്‍ കുളിച്ചു-

കളഭം ചാര്‍ത്തി, അമ്മതന്‍ ചേല-

ത്തുമ്പില്‍ തൂങ്ങി ക്ഷേത്രം ദര്‍ശിച്ചതും

അച്ഛനു മുന്‍പേ നടന്നു-

കേമനായ്, പാടത്തും പറമ്പിലും 

പൂത്തിമ്പികള്‍ക്ക് പിമ്പേ പാഞ്ഞതും

വാത്സല്യമൂറുമീണത്തിലമ്മ

'ഉണ്ണീ'യെന്നെന്നെ നീട്ടി വിളിക്കെ 

ക്ഷണം അമ്മതന്‍ ചാരത്തണഞ്ഞാ-

മടിത്തട്ടില്‍ മാമുണ്ടിരുന്നതും 

പുസ്തക സഞ്ചിയും ഒരു കൊച്ചു-

പെന്‍സിലും, മഷിപ്പച്ചയുമായി

കൂട്ടരോടോത്ത് നാട്ടുവഴികള്‍ 

താണ്ടി പള്ളിക്കൂടമണഞ്ഞതും

എല്ലാം ഓര്‍മയില്‍ മിന്നിമറഞ്ഞു.

തെച്ചി പൂക്കുന്ന കുന്നിന്‍ ചെരിവും 

ആടികാറ്റിന്‍ മാമ്പൂ മണവും 

സതീര്‍ഥ്യരെത്രയോ പേരൊത്ത്

ചുറ്റി നടന്നൊരു വള്ളിക്കാവും 

കുളവും, നാട്ടരയാല്‍ തറയും

കൈതകള്‍ പൂവിടുന്നൊരാ നാട്ടു-

വഴികളും, കളകള നാദം 

ചിരിച്ചൊഴുകിടും അരുവി തന്‍ 

ഗീതവും, മദകര സൗരഭ്യ-

മേകിടുന്നൊരേഴിലം പാലയും

കണിക്കൊന്നയും, പുത്തിലഞ്ഞിയും 

വിഷുപ്പക്ഷിതന്‍ സങ്കീര്‍ത്തനവും 

നന്മയുടെ കൈത്തിരിയേന്തിയ-

തുമ്പപ്പൂവും, പൂവിന്റെ ഗന്ധവും

എല്ലാം എനിക്കന്യമായ്; അന്യമായ് 

എന്നേക്കുമെങ്കിലും, സ്വപ്നങ്ങളായ്

സുധാമയമായ് ചിലതെത്രയും 

ഭദ്രമായ്‌ കരുതുന്നിതോര്‍മകള്‍...