പാര്‍ലര്‍

അവള്‍ ആദ്യമായി ഐസ്ക്രീം നുണഞ്ഞത്
എന്റെ പാര്‍ലറില്‍ ആണ്.
ഐസ്ക്രീമിന്റെ തണുപ്പ്
ചുണ്ടില്‍ നിന്നും
ഉള്ളിലേക്ക് തുളക്കുമ്പോള്‍
അവള്‍ ഫ്രീസറിനെക്കാളും തണുത്തു
വിയര്‍ത്തു.
പിന്നീടവള്‍
പാര്‍ലറിലെ മേശമേല്‍
ഐസ്ക്രീമായി നിറയാന്‍ തുടങ്ങി...

ഇന്ന്
അവള്‍ തന്നെ
ഒരു പാര്‍ലര്‍ ആണ്.

വാര്‍ത്തകളില്‍ ഇല്ലാത്തത്

ഭൂഗോളത്തിന്റെ സിരാപടലങ്ങളെ
രോഗം ബാധിച്ചിരിക്കുന്നു.
കച്ചവടച്ചന്തയില്‍
ഹൃദയം
ചീഞ്ഞളിഞ്ഞീച്ചയാര്‍ത്തു തുടങ്ങി.

ഭൂമിയോട്.....

ഭൂമി,
നീ പൊറുക്കുക!
നിന്റെ
മുലപ്പാലൂറ്റി തെഴുത്തവരോട്
നാവുണങ്ങിയ കുഞ്ഞുങ്ങളുടെ
കണ്ണുകള്‍ ചൂഴ്ന്നെടുത്തവരോട്
വിണ്ടു കീറിയ  വിളനിലങ്ങളുടെ
മുറവിളി കേള്‍ക്കാത്തവരോട്.

പ്രണയം പൂക്കുന്നതെപ്പോഴാണ്?

രക്ത മേഘങ്ങള്‍ക്ക് കീഴെ,
ഇടനെഞ്ചു പൊട്ടി,
രക്തം വാര്‍ന്നു ചുവന്ന
കടല്‍ത്തീരത്ത്
ഞാന്‍
ഓര്‍മകളുടെ മുല ചുരന്നു
ഏകാകിയായി...